علاش؟

علاش عملت بلوغ و بديت نكتب؟ أو بالأصح علاش لازمني نعمل بلوغ و نبدى نكتب؟ تغرمت بالبلوغات و خصوصا ب البيغ و الكلندستان و الزاد و عيّاش و البرباش و برشة غيرهم ...من غير ما نطول مغروم بالقراية و مطالعة الجديد في تونس بالخصوص, ايامات الانتفاضة في الرديف عام 2008 كنت ضايع نحكي وحدي علييها و لا إنسان سامع بالحكياة بخلاف إلّي متبعين البلوغات...

و كنت نستنّى بصبر طفولي التدوينات البيضاء لإنها توحد البلوغات الكل لنفس الهدف محاربة الصنصرة الفكرية الافتراضية ... و كان عمار 404 ...و كان نهار على عمار و كان سيّب صالح و كانت الصفحات البنفسجية و كان توقيف فاطمة أربيكا و كنت فقط نتبّع و ساعات نحط كومنتار طايش هوني و إلاّ غادي...

كانت عندي محاولات, لبلوغ الأول في فيفري 2009 تحت عنوان "مولاكم الشلفوح .... و العيشة هانية" و لكن لظروفي الدراسية في ذلك الوقت كل شي طاح في الماء. المحاولة الثانية و تحمل نفس الاسم بالعربي للبلوغ هذا نسيت كلمة السر متاعو...ايه نعم هعهع كم انا لوووول

ممكن برشة تقول علاش البلوغ في هذي المرحلة بالضبط؟ عندي عدة أسباب منها انّي نحب نكتب ... و راسي وجعني كيف نشوف العوج و نقعد ساكت..و اشيلء أخرى شخصية

الموضوعات باش تكون متنوعة ... تهمني و تعبر على أرائي بالخصوص..و الجميع مرحب به لتقديم النصيحة و النقد بأنواعو

الحرية باهية... المسؤولية و الاحترام هوما الأساس

تشوووووس