نحب فرصة 2

* ماهو لاباس تبراكيلي صحبتي

- و الله يا استاذ خاطيني ,,,لا سلبتها لا براكيتها .. الحكاية و مافيها...

* شنو زادة باش تخرّفلي ... خطيبتي تكذب عليك ...تتبلّى تقول انت ؟ صنعة إلّي ما عندو صنعة نطيحو نشرو في المشاكل مع اشكال كيفك

- و راس الأخوة خاطيني ... راني مخرج محترم نلوّج كان على خبزتي ... و هيّا تحب تمثل ... و انا نقلك راني قبلتها و باش نعطيها دور

* كيفاش كيفاش بوها؟ مخرج و تعطي لصحبتي دور؟ تولّي تمثّل؟ هاك إلّي مازال عليّا شيقولو الأولاد عليّا... باين فيك كاره حياتك و ربّي سمعك و جابك ليّا

- يا خويا بالله سيّب المريول خليني نفهمك

* ما نفهمش... ولد بن علي و فهمي رزين ... مانيش مسيّبك حتى يخلطو ولاد الحومة وقتها نتفاهمو

- ولاد الحومة ؟ يا ميمتي يا ميمتي شبابي راح قبل ما نخرج الفيلم ... و الله النّهار عرفتو مزمّر من وجه النحس هاك....

* صار انت مخرج بالحق؟ ياخي بجدّك و إلا تفلّم؟

- يا سيدي مخرج و باش نبطّل من اليوم ... شعفة و توبة ندور بيه الدومان

* ساهل هوّ ... نحب دور في فيلم ... شوف حلّ و اصنع روحك... الشوكو موش خير منّي ...كان هو يمثل انا برفيسيونال و عندي البي تروا شاهدة... نحب دور

- يا وخيّاني اجريولييييي

* شبيك تدّاوخ ها مخرج...فيق راك راجل تحكي مع الرجال...ولاّ تحقر...بالحرام يا تعطيني دور ..ودور معلميّة زادة .. يا نحلّك اوتوروت من البات للكرافات

- دور شنو هذا... التّمثيل لازمو موهبة ... وانت و هي ماكمش موهوبين

* اش مدخل النّساوين في حديثنا .. رانا نحكو رجال صافي ... فاس آ فاس بالفلاّقي

- يا خويا راني ماحاشتي بحد...

* اعملّي فيلم سبيسيال ... هكة نسمّوه " قبلة الوداع" و إلا " البطل لا يموت" و إلاّ " كعبات تحت الحيط" حاسيلو فيلم فيه برشة ضرب و شوية حرابش و ما ننساوش البوس بالطبيعة ... قالو تبوسو برشة في الأفلام ... نعملو فيلم فيه شوية بوس منّو نبدلو منو فاميليال

- نعم نعم ؟ بوس ؟ تحب تبوس؟ في فيلم فامليال؟ اه يا راسي اااااه يا راااسي

* شبيك العزيز مانيش عاجبك؟ قتلك تحقر و الحقّار يموت ذليل ... علاش ما نبوسش؟ دوني و إلا مانعجبش...

- باهي باهي اوكي ... عندك برمي؟

* علاش البوس بالرخصة؟ هع هع شبيك ها مخرج خلّيك شوية لوجيك

- رخصة سياقة ... حاشتي بخليقة في دور و يسوق .. صحيح موش دور كبير اما لازمك تعرف تسوق

* موش مشكلة نسوق ... طيحت شويّة كراهب انا... وقتاش نبدى

- نكلم اعرافي و نكلمك .. والله نكلمك سيّب  المريول بركة

                       

+كيفاش كيفاش... تعطيه دور و انا الزين و العين لا؟

*سكّر فمّك لا نهبّطلك زروسك ...حد ما يصيح على عرفي في حضوري

+عرفك؟ لا حاكلك

*قتلك سكّر حلقك

-تضربني بكف؟ و الله إلا ما نتفاهمو ... و إلّي بيناتنا وفى .. مضمض

*تي وين المخرج؟ يا مخرج يا مخرج؟