اي نعم زنوس

جمعتنا الغربة و فرقتنا الأحزاب ...

 فهمتها كيف حكيت فازة ...  فازة ضحكت الناس الكل كان سي وخينا و لفّ لفّه ..

قاعدين ملمومين في بلاد الفرنجة .. إلّي هي بالطبيعة بلاد كفّار عند البعض "المتأسلم" .. و مانيش عارف كيف ها "المتأسلم و لفّ لفّه" يعرفو إلّي بلاد الفرنجة كفار آش مجيّب دين والديهم هون .. ما علينا ... بديت نكرّز

عاد قلت قاعدين ملمومين نحضرو في سهرية باش نعرفو بالتقاليد التونسية من تراث غنائي و ماكلة و لباس .. الحديث تهز حول الانتخابات .. الفكرة بسيطة كل حزب يقدّم روحو في عوض نقدّمو التراث متاعنا على خاطر ثمّ حاليا صراع هويّة في تونس

جبدت حكاية من الحيط :

-          اهلا ولدي ولد الباي ... الباي الأكبر معاك .. و الله حاير يا ولد بنتي ... نحب ننتخب النهضة و ما عرفتش شنيّة شعارهم ..

-          شعارهم النجمة .. اوكا ثبّت معايا مليح .. النهضة في العلالي و النجمة ديما الفوق

-          يعيشك

الجماعة بكلها ضحكت .. كان زوز زنوس , اي نعم زنوس ... زنس منهم قام يعيط

-          فرحان بروحك .. تخلّي جدّك ينتخب كفّار .. اثم هذا في رقبتك

-          يا ولدي رتّح روحك .. الحكا...

-          لا حكاية لا والو ... القطب متاعك كفّار .. تعرف أش يقولو؟ اخر حاجة طلعو بيها يحبّو الدولة تتلها بأولاد الحرام و يعطيو الزانية 500 دينار في الشهر ... نورمال ياخي ..

-          يا شسمك .. موش هكّة الحكاية ..

-          ما نسمعكش ... ربّي قال ارجمو الزانية موش اعطيوها 500 دينار .. تنجم تجي قدّام اش قال ربّي ...

الحوار الأحادي كان طويل شوّية .. المعلومات بكلها من باجات الفايسبوك .. و كل منهو يقول لا كافر

الحقيقة الدخول في جدال من هذا النّوع موش جوّي .. بالخصوص مع "متأسلم تكفيري في بلاد الفرنجة" .. يخلّيتو يكمّل كلامو كيف ما يحب ... هزّيت روحي و روّحت , مام قبل السهريّة ما تبدا ...

رهوط و زنوس كيف هكّة موجودين .. المشكلة موش الراي الآخر مرفوض .. أما حتّي الفدلكة ولاّت موش باهية – باش مانقولش حرام –

حريّة التعبير بالنسبة ليّا ماهياش في خطر .. حريّة التعبير قاعدة تموت , تحتضر .. و نجم نقول كلام كيف هكة كيف نشوف "زميل" يفكر بالكيفية هذي و هو يسمّي روحو متفتّح ...

نرجعو للموضوع نهار 23 جانفي الجاي "انشاء الله" (كيف ما يكتبوها أهل العلم الجدد)

الشعب غرق في الماء

الانتخابات كملت و النتائج الوقتية طلعت و الشعب غرق في الماء

النهضة بتسعين كرسي بالطبيعة كان قعدولها تحب تعمل حكومة و بدا الشيخ راشد في زيارة راعي الديمقراطية عاق الوالدين متاع قطر ... و بدا يحكي على مجلّة الأحوال الشخصية و كفالة "اللقيط" و تعدد الزوجات ...

التكتل قرر أنّو يتكتّل مع أي واحد يعمل حكومة... جماعة تتكتّل بالطبيعة.. و الدنيا مع الواقف ... أوكا شوّية لعب بمصطلحات "ندخلو في حكومة وحدة وطنية موش حكومة ائتلاف وطني"

المؤتمر إلّي حط العصا في عجلة اليسار متحالف مع المتحالفين و دز في لوغة أحنا مزمرين

ميّة و الشابّي دوروها معارضة بالرغم إلّي هوما حياتهم بكلها معارضة ...

قاهرني كان هاك ولد الرّياحي مازال يحب على فلوسو ...

الخطاب السياسي التونسي امتاز بالركوب على الأحداث ملّي بدات الثورة و توْ ظهرو السياسيّين على حقيقتهم : نحبو الكراسي و المجلس يا مواطن اعطينا صوتك ..

بعد الحنّة التاريخية – أو ما يعرف بالصبع الأزرق- نهار الحمّام ها الأحزاب ولا واحد فيهم نطق ... مناطق بالخصوص المزمرة الماء فات فيها ميترو و نص و مواطنين ماتو و أراضي فلاحية مشات و الرهوط لاهية كل واحد يجبد من شيرة ...

ما نحبّش نغلط في الكلام – موش وقتو توّة – المواطن يحب كرامتو و يحب شكون يتلها بيه و بعيشة صغارو موش نعرسلك بأربعة و حكومة خريان كيوف وطني...

المشكلة أنو حزب جايب كان حق الفيتو يحب يحكم ... و الجماعة تقسم و المواطن بالحق غارق للعنكوش

البارح فركتها على نهضاوي – برشة منهم خراو فيه و بالخصوص القاعدة متاعهم – كيف 7 شهور يحكي على حكومة الظل و كمال اللطيف و السبسي عميل ... و الجماعة ساهرة مع بعضها عند سفير دزاير و معاهم جماعة النهضة ...

ملاحظة لا تمت للواقع بصلة:

زعبع قاللنا الشباب هو الحل ... نفس العام هز دبشو و قطّع ...

تونس أنتخبت و قالت كلمتها

تونس أنتخبت و قالت كلمتها ... و الكلمة هذي ماهيش باش تعجب " الخاسر " في الإنتخابات ..

النتائج الأوّليّة المسربة تقول بتقدّم النهضة بفارق أقل ما يقال عنّو كبير على أقرب مترشّح ..

مفاجأة الإنتخابات موش كان سقوط القوى الحداثية و اليسارية – و خصوصا الشيوعي و القطب – المفاجأة الكبرى هي الحامدي أو ما يعرف عند التونسيين المتسيسين – من نهضة و تقدم و مؤتمر و تكتل و قطب و شيوعي و ... – بقذّافي تونس ...

الخاسر في الإنتخابات هذي هو إلّي يشوف هذي الإنتخابات من زاوية شخصية ضيقة ... و كان حزب خسر ... 

تونس ربحت ... أوّل مرّة انتخابات شفّافة بالدرجة هذي لازم الناس الكل تكون فخورة بيها ...

ثمّ حاجات شدّت انتباهي في الإنتخابات هذي ... و هي الخطاب الحزبي .. فكل يغنّي على ليلاه, و خسارة الأحزاب التقدمية و الحداثية هي بمجملها بناء خطابها الإنتخابي على منافسة النهضة إلّي اعتمدت أكثر على منادات و مناشدة الوازع الديني للناخب .. و التونسي مسلم بطبيعتو و يغار على دينو

الخطاب الثاني كان إستعمال وسائل الإعلام فالقوي الحداثية و التقدمية كانت حاضرة بقوّة في نسمة .. ونسمة وقعت في فخ التطرف الحداثي بعرض فيلم استغلّوه المتطرفين المتأسلمين لمواجهة التقدميين و كانلهم ما حبّو ...

اتهام التوانسة بالجهل و الغباء اتهام موش في بلاصتو على خاطر التوانسة الكل موش كيف كيف و العايلة التونسية بيدها ماهيش كيف كيف ... كان ما صوتلكش التونسي اليوم اخدم على روحك ... شوفو اش يحب و اقنعو باش ينتخبك بأفعالك موش بسبّان المنافس متاعك ...

نرجعو للمفاجأة الكبرى ... الحامدي هذا نعرف عليه حاجة وحدة ... مرّة تفرجت عليه في الجزيرة في الإتجاه المعاكس و كان مقابلو الغنّوشي ... و كان مع زعبع "حتّى لوكان يحبسلو العايلة متاعو"

الهاشمي هذا استعمل العروشية في الخطاب الإنتخابي متاعو و زيد داخل ببرنامج روبنهودي "بفكان الفلوس متاع إلّي عندو و يعطيه للي ما عندوش" يحب يولّي رئيس ... صحّة ليه بعض التوانسة مازالت تخمم بلوغة ولد حومتي و ولدي عشيرتي و ولد نانت عمتي ... وزيد المبادرة متاع ولد مرجان ما جابت مقاعد كان في الساحل ... و زيدهم عبد الناظر في صفاقس ...

الحاجة الباهية في الحامدي أنّو وحد التوانسة الكل -– من نهضة و تقدم و مؤتمر و تكتل و قطب و شيوعي و شعب موش متحزّب..– على كلمة "منين طلع هذا "

كثرة الأحزاب الصغيرة و كثرة القوائم المستقلّة كانلها أثر كبير علي المجرى الإنتخابي ... بالطبيعة برشة أصوات ماكنلها حتّي قيمة إنتخابية و مشات في الفارغ للأسف و هذا لازمو يكون عبرة للجميع باش ما يدخلوش فرادي كان وزنهم صغير  ... و ينقصو برشة غرور ... و هانا نتعلمو

برافو للمرزوقي إلّي أثبت أنّو المال السياسي ماعندوش قيمة كبيرة قدّام الفكرة ... على الرغم للسابوتاج إلّي عملو لليسار التونسي ...

لازمنا نفكرو بعقلية تونس ربحت موش حزب ربح و حزب خسر ... و العمل الثوري توّا بدا ... و إلّي يحب ألّي في بالو ... الشارع قدّامنا و كيف ما طار زعبع ... أي ديكتاتور آخر نطيروه ...

 ... يا جماعة ... برجولية يزيونا من الغش و النرفزة , التفدليك هو أصل الديمقراطية كيف نفركوها على حزب لازمو يقبل الفدلكة كانو رابح و إلاّ خاسر ... و يزيونا من ماء الفرق و سرير بو خمسة بلايص ...  الحاجة الباهية توّا نجمو نقولو لنهضة و جماعتها "طحّانة الحاكم "

تحيا تونس

تونس بكلها تنتخب ...

تونس بكلها تنتخب ...

 تونس مشات تنتخب ...

 تونس انتخبت و العالم حل فمّو ...

النتيجة موش أهم حاجة – بالنسبة لتدوينة هذي على القليلة – تونس كلمتها حرّة ...

شهرين لتالي و الحال رمضان ... عرك و سبّان و فضايح قدّام المخابز و قدّام الفطايري و كل واحد كشاكشو على وجهو و دز في حشيشة رمضان ...

تونس قالولها راك لازمك تصنع التاريخ ... قالت هات القلم و انا نورّيك .. صفوف فاقت الكيلوماتر و ثلاثة و أربع سوايع و تونس شادّة الصفّ باش تنتخب ...

تونس عملت في نهار إلّي شعوب عربيّة و مسلمة و إسلامية ما عملوهش ... شدّت الصف من غير دزني و ندزّك .. من غير انا جيت قبلك ...

تونس بكلها تتبسم .. من صغيرها لكبيرها ... الصغار تبكي من ظلم العمر ماعندهاش الحق تنتخب و الكبار تبكي أوّل مرّة تحس روحها بالحق تنتخب ...

تونس أول مرّة رايضة .. لا سرقة لا عرك عشاير لا يا ساحلي لا يا صفق لا يا قعبوط ... بكلها تتنخب ...

تونس انتخبت ... و ممارسات التجمع القديمة ما وفاتش ... نقصت صحيح و هذا المفيد ...

ناس مازالت تدفع في الخمسة و العشرة دينارات و الكسكروتات و تهز في النّاس باش تنتخب ... تأثير على الناخبين بالفوسكة في اليد ... ممارسات بالية مارسوها ناس "توانسة" ... سيحاسبون قال الزعبع

مبروك للرابح ... الرابح مهما يكون راهو تونسي و ولد بلاد ... و مهما يكون .. متعاطف معاه و إلاّ لا ... لوكان تونس ما تتحطش فوق كل اعتبار ... تونس تورّيه النجوم في عز القالية

باش نشكر الشعب التونسي على المستوى الحضاري العالي إلّي كان فيه من أخلاق و انضباط و مسؤولية

نشكر زادة الجيش الوطني إلّي كان في المستوى المعهود بيه

و نشكر مع بعض التحفض حكومة السبسي لمجهوداتها –ولو كانت منقوصة في عديد الأحيان – طيلة الفترة الماضية

تونس لينا الكل ... يا نخدموها الكل ... يا ديغاج  

تخمم فلّي نخمم فيه ؟

موش ساهل الواحد يوفّق مابين التزاماتو المهنيّة و الدراسيّة من جهة و ميولاتو الثّقّافية من جهة ثانية .. هذاكا علاش الفترة التالية الكل بجّلت قرايتي – براس الحنينة صدقوني – و ما كتبتش بالرّغم أنّي متابع عن طريق الفايسبوك – كي التوانسة الكل- بعض الأخبار من هون و غادي.

الجمعة الفايتة لقيت دعوة مفتوحة للجميع لحزب المؤتمر من أجل الجمهوريّة في المدينة الأفرنجية إلّي نسكن فيها من أجل توضيح و مناقشة البرنامج السّياسي.. قلت علاش لا ما نكوّنش فكرة على الحزب من أعضاء الحزب بيدو و نطرح بعض الأسئلة باش نفهم شويّة حكايات ..

 توكلت على الخالق و مشيت ..

نهارتها عامل بون كيف .. شايخ قدقد .. دخلت للصالة لقيت زوز برك حاضرين قبل الموعد بدرج .. موعد تونسي بجدارة.  جاني شاب محترم برشة و سألني أش معجبني في المؤتمر ؟؟ برجولية مافهمتش إجتماع مفتوح و إلا إجتماع معجبين ..

-         ماثمّاش كسكروتات؟

-         لا ماعندناش

-         برفان جاردور؟

-         كيف كيف ما عندناش

-         هممممم ... قفة قضية و إلاّ طرف دبش؟

-         هاها و الله ما عنّا .. مشحتفين عللخر ...

-         هاو علاش جيت مالا ..

وليّناش نضحكو .. و زدت عرفتهم مشحتفين بالحق ما عندهمش لابتوب باش يعملو البريزونتاسيون ... ولات حلقة مضيقة للحوار ستيل سؤال جواب.

بعد ساعة جاو جماعة صغيرة و بدا الحوار .. تقديم للحزب و تمجيد غير معهود لشخص المنصف المرزوقي .. وزاد قالو "صديق حميم لنلسون ماندلاّ" .. الحلقة بدات بالغالط ... بالنسبة ليّا بالطبيعة.

بعد التقديم المطوّل لشخص المرزوقي و إلّي الحزب يظم جميع مكونات المجتمع التونسي من التقدمي للحداثي للإسلامي للإشتراكي لليميني للمنعرفش شنو آخر .. أول سؤال للحاضرين كان " شنو مصدر التشريع بالنسبة للحزب؟"

طفلة قاعدة بحذايا شبابة موش نورمال ... غزرتلها و سألتها:

-         تخمم فلّي نخمم فيه ؟

-         تقول انت نروّحو؟

افّكتيفمون ... هزّينا رواحنا و قصدنا ربّي

بعد نهارين وصلتني معلومة تقول : الحوار دار حول العلمانية و نظام الشريعة و وفى بتكفير الحضور. 

كبّ الطنجرة

سلام

والله ليكم وحشة ... كل عام و أنتم بألف خير و سنين دايمة ..

الأيام الفايتة الكل و أنا باخل باش نكتب ؟؟؟ داززها سهريات إفرنجية عالمية .... لا علينا ...

اليوم طحت في الفايس بوك بدوكيمون موش نورمالل ... ممكنن برشة شفتوه ... سي باعث جهلبغل الغربي غصرة يحقق في هاك الحكاية أول ما هرب زعبع ... و الراجل إعترف بكل شي .. شبيه دين امو موش في الحبس ... راهو رتحنا من خليقتو و من منظرو ...

حاجة أخرى ... السيد ماعندوش بو ... واخو اسم أمّو ... ملاّ سلع

كبّ الطنجرة .. العربي يطلع نصرة

الحلّ ما يكون كان

سلام

الوضعيّة في تونس راكحة نسبيا .. رغم الإعتصامات الفارغة إلّي مازالت موجودة .. و ما ثمّاش عرك عروشات و الكرتوش ما يخيّطش .. التّنبير موش مشكلة هاو بدينا نتعودو بيه و السبسي و المبزع مازالو مكبشين  فينا ما يحبّوش يفهمونا تبارك الله عليهم .. ماهو كيف ما تعرفو الحال رمضان و اللازم لازم.

على ذكر سيدنا رمضان .. التونسي بو العايلة و أمها همّوا لوّل عايلتو .. و عندو الحق و ألف حق .. ياخي كيف تجي فيه ضربة خاطية متاع مظاهرة و إلاّ مانيش عارف شنو ؟ زعمة انت و إلا انا و إلاّ شكون باش ياقف بيها العايلة متاعو؟ ماهي تقعد للحاجة و الفجعة و أمور يبعدها علينا و عليكم إن شاء الله.

كلام كيف هذا يوجع برشة ناس ..

-       مالا كيفاش نتطوّرو و نتقدّمو كان ما نضحّيوش؟

-       يا ولدي برّا ضحّي انت و احنا تو نشوفو ...

-       هذا كلام متاع واحد عميل للسبسي ..

-       عميل للسبسي و الماسونية ,سافان؟

التّوانسة الكل بصفة عامّة يفهمولها مليح .. و كل واحد كيفاش يقراها و يخدّملها طاستو و يتحرّك .. و وقت كيف الأيّامات هذي أكبر دليل على هذا .. الحال آخر رمضان – اون فان – و العيد نهارين ماكس و يجي و الرونتراي سكولار و مالازمها و عيد العلوش وراهم و الريفيون ومندراك .. يا بولعيلة قدّاش منو شعر راسك

الحلّ؟ برشة حلول و شبعة سوليسيونات .. ثمة شكون يشكر باعث القناة و يضربلها صندوق حن’بغل .. ثمة شكون ياقفلو الكميون قدّام دارو و ضربلها قفيفة إتخاذ خر-طر .. جماعت الحركت يجيوهم لباب الدّار و قفّت بارفان جاردور و كتاب علامات الساعت و عذاب القبر .. و كلّ قدير و قدرو و كلّ مزهار و زهرو

كيف المواطن فدّ بالضّبط من السياسة و تلها بمشاغلو الخاصّة اليوميّة من توفير لقمة العيش و حياة كريمة .. جماعة البولتيكارد ما يخلّيوهش رايضين .. لازم يحسّوه بالنقص بالتبعية للأغنى .. قدّاش منها قفّة رمضان و التضامن و هات من هاك الهندي المشوك؟ تي هوّ بن على الهارب كان عامل فانسيس فانسيس ... لوقتاش بعض الأطراف تحب تأثّر على النّاس بحركاتها الإنسانية الوصولية؟ زعمة إلّي لاباس بيه ماقاش يعيش ؟ آهم ناسيينهم؟

المعروف على التونسي ما تتعدّاش عليه بالساهل .. يضرب ضربتو و يلوّج ضربات أخرى .. الحمد لله تونسي و راسي عالي .. أما الحل لهاذا الكل ما يكون كان في نظام مواطنيه مسؤولين تجاه رواحهم.. و بكرامتهم ما يأثر عليهم حدّ .. مواطنين تفكّر موش إتّبع ..

أيّا يا سيدي بعد أيّامات من التحليق قدّام التلفزة عرفت إلّي تونس عندها التّابعة ..  و تابعة تابعة كي الشيكلاي تلصق ما تطيرش .. شنو الحل يا ولد الباي؟ شنو الحل؟

وجدتها .. أي نعم لقيتها

الحلّ ما يكون كان عند سي وخينا هذا

الرّاجل نابغة علاّمة الزمان .. أنا مع أنّو يشدّ رئيس أما موش مدى الحياة .. أوكى يعمل عشرة عشرين .. يا ينقلبو عليه يا نجبدولو جدّ والديه

كثر الهمّ ... يبكّي

صحّة شريبتكم

اليوم مشيت نشري في تسكرة الطيّارة لازمني نرجع لبلاد الفرنجة لمواصلة الدّراسة ..

 قدّام الأجونس متاع تونيسار كانت ثمّة مظاهرة حسب توصيفات البعض "حاشدة" .. قلت نتمم أموري و نمشي انسنس .. أنا برجولية خاطيني حكاية المظاهرات في القايلة متاع سيدي رمضان .. بالخصوص كيف تلقى فيهم وجوه تعرفهم مليح ... وجوه سبعة شهر لتالي كانت تلبس في الموف و تقفّف و تبندر ...

آيّا يا سيدي شريت التّسكرة المحنونة و كطّيت الفلوس كاش .. دنّوس ينطح في دنّوس .. اما و الله يرحم والديه الأجون فرح بيّا كيف عرفني ولد الباي و زيد عملّي سوم ياسر سبسيال – تخفيض ب ميات دينار يا بوقلب- و الله لتو لا فهمت كيفاش ... لا علينا يرحم والديه ...

أيا يا سيدي خرجت نلقى وجوه ضاربها العطش و السّخانة .. أوّل واحد سألتو علاش المظاهرة قالّي " السبسي الجبان العميل يخرج في الطرابلسية من الحبس .. و احنا ما عنّاش خدم .. نحبّو نخدمو " .. زدت سألت واحد أخر قالّي " نحبّو حقنا في الخدمة .. و نحبّو نطيحو النظام متاع بن علي " و الثالث زاد عليهم "و الله ما نعرفش بالضبط ... أما هاني معاهم نقصّر في النهار "

استغربت برشة على خاطر من بعض اللافتات و كساوي المحامين عرفت إلّى أهم مطلب هو إستقلال القضاء و محاسبة الفاسدين .. برجوليّة ضحكت .. ما نعرفش اش نسمّيها ضحكتي ... زعمة شماتة؟ زعمة إزبهلال؟

نعرف مليح أنّو كيف تخرج مظاهرة بأهداف واضحة  ديما تلقى فيها شكون ضايع "أصل" أما تجي مرا هازة لافتة مكتوب فيها " أريد حقّي في الزواج ... ديقاج يا خمّاج" هذي قويّة بالضبط

أيا ستنّيت شوّية و روّحت .. العادة بالكرهبة ما نثبتش مليح اما وانا داخل للحومة مشيا على الأقدام شفت إلّي مقر الشعبة مكتوب عليه "لجنة حماية الثورة بحومة ولد الباي" .. برّا يا سيدي بالطبيعة الثورة لازم شكون يحميها ...

 عملت طلّة نلقى فيها ثلاثة عباد ... دزّيت الباب و دخلت – قيّد على الثّورة – يا سيدي بن سيدي الثلاثة هاذم طلعت نعرفهم للأسف الشّديد .. الأول و عرفني بنفسو بحاجة تشبه امين عام اللجنة .. و انا نعرفو مليح برئيس شعبة الحومة "سابقا" و يدور يقيّد في الأحوال و كان ما تدفعش 26-26 و تعمل إشتراك تجمع تجيك البلدية "بناء بدون رخصة" و الزوز الأخرين حافضو على نفس الرتب السابقة "أعضاء" ...

عاد سألت بكل بلاهة " موش أنت رئيس الشعبة؟"

جاوبني بكل استنكار أنّو الثورة المجيدة قطعت مع الماضي و ولّينا في عهد الحريّة و الحقوق و ماقاش خوف و المواطن هو الكل و برشة حكايات بنفسجيّة ... اما التعاسة الكبرى كيف قالّي انو الثورة لازمها تتواصل لمواجهة الماسونية الصهيونية العلمانية ..

 ما فهمتش شبيهم العباد "اللافاهمة" تتفوهم و تتفوّة بألفاظ صعيبة عليها ..

ضحكت و المرّة هذي عرفت علاش ... و الله المرّة هذي ضحكت بالغلبة ... ايييه يا ثورة ... حتّى وجوه البلاستيك ثوريين ..

ايّا رجعت للدّار و أنا على يقين أنّه لا رئاسة مدي الحياة بعد اليوم ..

-       ما عينيش نكمّل ... كرّزت -

القذّافي يبدع من جديد

يقوى عليه ربّي ها القذّافي .. سلعة هي بيدها

دين امّو سبعة شهور و الناتو يقصف و "التوّار" دايرين بيه من كل شيرة و هوّ جابد بالرّاكح تقول عايش في كوكب آخر .. صحّة ليه

و الأغرب مازال يفدلك .. بصحّتو

غصرة صوت الشّعب

علاش في تونس بعد الثّورة النّاس الكل تحب تعمل إلّي في راسها و تتناسى أنها كانت تصفّق للمخلوع كيف يعمل إلّي في راسو أو بالأحرى روس الحاشية إلّي معاه؟ سألت روحي و ما عرفتش آش نجاوب

كيف نسمع جرذ كبير  ... و هوني الكبر من النّاحية الماديّة البختة للجرذ .. عاد قلت كيف نسمع جرذ كيف صاحب قناة خاصّة "واطية النيّة" .. تي هاك باعث القناة الغربي غصرة و مندراك ...

بعمري ما حبّيتها ها القناة .. الله غالب دمّها ثقيل برشة و باعثها أثقل ... مانيش باش نحكي عليها قبل الثورة و نشرها للطّحين بجميع انواعو .. عفا الله عمّا سلف في الوقت الحالي ... آما شدّ انتباهي في تحت شعار القناة " حنبعل ... صوت الشعب" ياخي نورمال؟

سي باعث القناة قال في حوار جديد مع إذاعة الموزاييك .. بربشو تو تلقاووه .. انّو هو عن طواعية يحب يوصّل صوت "الشّعب" .. و هوني أول المصايب .. هوني الواحد يتسائل لشكون باش يوصّل صوت "الشّعب"؟ زعمة للحكومة المؤقتة؟ و إلاّ لفاعل خير؟ و إلاّ للشّعب بيدو؟

"الشّعب" متاع ها "الغصرة" شعب مزمر برشة و يشكي برشة و يحبّو يعطيوهم الخدم برشة و مهمشين برشة و قناة حنّبعل أول قناة تجيهم برشة ... باه موش مشكل برشة .. المشكل انّو في المسرحيّة البرنوهزلية  ... "الشعب" متاع ها الغصرة عندو الحل للمشاكل متاعو .. شكر باعث القناة و مدحه و الدعاء له بدوام الخير و النعمة و القناة و هات يا من هاك الكلام المبتذل ..

هي صحيح القناة خاصّة .. اما نورمالمون ما عندوش الحق يعمل أش بحب و يعمل بروباغاندا لشخصو من أجل أغراض مجهولة للبعض و معلومة لبرشة "بعض" آخر و هوني نطالب ب ميثاق إعلامي يبتعد بالإعلام عن التبندير و التصفيق و الشخصنة النرجسية.

سي باث القناة يستقبل زادة في مسؤولي بعض الأحزاب "الثّورية" .. بطريقة تقول قص و لصق من استقبال المخلوع للشخصيّات في هاك الايّامات  .. و كلهم يشكرو في باعث القناة و اللفتة الكريمة و راس مازمبي ...

تو الواحد يقول علاش ها المقدمة المعروفة لتوانسة ..

أيا ياسيدي كيف ما لاحظتو و شفتو و ممكن تبعتو الشّيخ مورو يقدم في برنامج "ديني" على ها القناة ... صحيح فيها و عليها .. ما يهمش .. سي السيّد ماهو مستعرف بحد وما عاجبو بحد و يعمل إلّي يحب في القناة متاعو ...

الغريب في الكل هو المستوى الضحل للحوار للباعث متاع القناة في الحوار اللّي ما يتعدّاش مستوى متاع خليقة تربّي في الحبوسات .. و الأدهى و الأمرّ هو أشباه الصّحّافيين إلّي يخدمو عندو .. بالطبيعة هو صاحب القناة و رائد الاعلام الخاص و الأهم صوت الشّعب .. اكثر صانع روّبلي الباطاطا هاك الشّابي بشعرو  بتملقو بضحكاتو الصّفرة و أسئلتو الخطيرة ...

الزرّاع يمشي يدفن روحو خيرلو ما يستاهلش الواحد يحكي عليه ...

ها العربي نصرة إنسان عمل قناة ... تبدلت البلاد بعد الثّورة .. طاح يشكر في روحو عن طريق "الشعب" ... و مانيش  باش نستغرب كان ها الكائن الشلغمي يكشف حقائق خطيرة من نوع انو هو ألّي عطى البوعزيزي دبوسة الديليون و زاد قال للبوليسة تضربو بصرفاك و طلب منها زادة في آخر لحظة باش ما تضربوش .. و هو إلّي قاوم القناصة و زادة طلب من الجيش باش يحمي التوانسة من الشرطة و هو كان السبب في هروب المخلوع ... و بالطبيعة "الشّعب" يشهد ..

انا بالنسبة ليّا كمواطن من الشعب التونسي العظيم .. نرفض قطعا استعمال مصطلح الشّعب في ها القناة و في جميع القنوات الأخرى كيف ما قلت في التدوينة السابقة ... الشعب موش حفنة تصفّقلك .. الشعب أكبر منك ها غصرة ..

أيّا على كل ... الحمد لله شوقي طلع حي ... شكرا باعث القناة