رمضانكم مبروك

سلام

غدوة إن شاء الله أوّل أيّام شهر رمضان .. شهر النّاس بمكثورها تستنّي فيه خاطرو شهر الرّحمة و شهر العبادة و شهر صلاة و شهر ما نعرفش اش نو ....

أن شاء الله ربّي يباركلنا فيه و يعطينا القوّة باش نجمو نصوموه على أكمل وجه و في أفضل حال ...

مع هذا شهر رمضان في تونس هو شهر التبذير ... وشهر الحشيشة  أو حشيشة رمضان .. شهر الناس الكل تصرف فيه من غير ما تخمم .. أما الحاجة الجديدة السنا .. أوّل رمضان بعد الثورة ..

نحب نحكي شويّة على التونسي و عاداتو في ها الشهر ... و الله شي ينطق ... ساعة لتالى مشيت مع الوالدة للكوشة ناخذو زوز باقات .. أي نعم العايلة حارة و كعبة مع الضيوف وحاشتنا كان بزوز باقات .. الكوشة مليانة برشة و كلام زايد و عياط و هات 10 هات 20 باقات .. برجولية شي يقزز انّو ما يصطلح على تسميتهم "رجال" تتعارك على خبزة في كوشة .. قساوات

التونسي في رمضان غير التونسي باقي الأيّام .. يدّو تولّي ممدودة و ما يغلى عليه شي و هذا نشوفو باهي .. اما يدّو ممدودة "في القهوة " باش يلعب رامي و بلوت ماء و ضو و خلاص يوصل 50 و 60 دنوس للطاولة عيب و هبل و إسراف

في شهر رمضان .. التونسي بالنسبية يولّي متأدب .. علاش لا ما تكونش فرصة باش يكمّل العام بكلّو؟

حكيت على الفرص... رمضان شهر الصّيام .. البيرّة و أخواتها ما تدورش في البلاد .. باهي و لاّ خايب  صحيح و ألا غالط حاجة تحبلها نقاش ... اما أنا شخصيّا نشوفها فرصة باش الواحد يبطّل مصروف زايد .. الدخّان كيف كيف .. نهار كامل المخلوق صايم و في الليل يحرق رواريه .. و لله عجايب .. الفرص برشة و الخنّار متاع رمضان الكل نعرفوه .. و نحكيو بيه و عنّا ليه ألف حل و حل أما ماك تعرف ... شهر رمضان بالبركة متاعو

ايا نخلّيكم مع شاعرنا الفذ حسين الجزيري  وين يتغزل بملذات شهر رمضان بطريقتو الهزلية ، وإليكم القصيدة


فرحت بمقدمه بطون الناس *** شهر تحــــن لذكره أضــراســــي
تلك الموائد ما جلست أمامها *** وضربت أخماسي إلى أسداســــي
إلا وصار القلب في شرك الهوى*** يرجو تعـطـف مــرقة البــسبـاس
ويلوذ بالأكباب وأشواقي إلى *** طاجـين جــبن طيب الأنفــــــاس
يا للبريك ويا للحم حشوه *** قد جودوه بقـــوة المــــهـــــراس
لي في محبته شهود أربع *** لـحم الدجاج، وسـلتة الأتيــاس
والجوز في تمر تحلى واستوى *** وكذلك تشهد بوزة في الكـــاس
كيف التصبر والبطاطا أشرقت *** والمــسفوف فــي الكســكــــاس ؟
إن القطائف لامثيل لنورها *** فتضيء وسط البطن كالنبراس
كيف السبيل لذي الصنوف وجمعها*** والجيب مخروم من الإفلاس ؟

رمضانكم مبروك

اليوم مشيت باش نقيّد

اليوم مشيت باش نقيّد .. اي نعم ولد الباي هزّ الكرهبة و مشى باش يقيّد ...

مشيت ديراكت للبلديّة .. نلقى لافتات كبيرة تعمل في البيب للانتخابات .. قلت و الله شي يفرّح ما ثمّاش أحزاب سياسيّة تستغل في الموقف .. على القليلة في المنطقة هذي .. دخلت للبلديّة نلقى 3 لابتوبات و 3 امبريمونتات و زوز أعوان برك .. لاخر و لاّ الأخرى وينو/ها؟ حاسيلو ما كانتش مشكلة كبيرة زوز برك قبلي و ديجا قاعدين يصححّو على ورقة التّسجيل

جا دوري .. أي نعم أنا و لأول مرّة باش نسجّل في القوائم الإنتخابيّة .. قبل كانو يسجلولي و ينتخبولي و انا ما فيباليش و هذي حكايتها حكاية

في 2009 ايّامات كنت طالب نقرى في بلاد الفرنجة .. اون فان مازلت .. كان الحال الانتخابات الرّئاسيّة و التّشريعيّة .. نهارة الانتخابات .. زميل في الدّراسة محسوب على بوه متاع تجمّع منحل كبير قالّي شبيك ما مشيتش تنتخب .. و بدا يمرج لين مشيت ... دخلت للقنصليّة .. و هوّا في الحقيقة بيرو صغير تابع القنصلية الكبيرة .. نلقى "المسهول" قدّامو صندوق أصفر و أوراق ملوّنة و قهوة و كعبة بان او شوكولا ..

-       السلاّم عليكم

-       تفضل اش تحبّ؟

-       جيت ننتخب

-       انت موش ولد الباي؟ ماهو عندك بورص من الحاكم؟

-       ايه نعم انا ولد الباي .. و البورص من وزارة التّعليم العالى

-       شنو تتبهنس تعليم عالى؟ اش عندك باش تتنتخب كان السّيد الرّئيس و الاوراق الحمر . ايا برّا على روحك راهو ديجا انتخبنالك و امورك هانية

-       اه صار هكة الحكاية .. و كيف نمشي نشكي

-       تو سامبلمون تتنحالك البورص .. فهمتها كيفاه

قعدت باهت ما فهمت شي .. هزّيت روحي و افرنقعت من غادي .. كلّمت في اللّيل الوالد قالّي صارتلو نفس الحكاية اما انتخبولو ليه هوّ و للوالدة و ليّا انا زادة في الحومة متاعنا .. برجوليّة ولّينا نضحكو .. ولد الباي بو زوز أصوات .. ايا يا سيدي شفتو القوّة ...

ايّا عاد نرجع للبيرو في البلدية .. الموظفة طلبت منّي بطاقة التعريف .. ولد الباي من عام ااى اكثر من ثمنطاش تسكن في المنطقة الترابية التابعة .. تحب تنتخب في المدرسة؟  جاوبتها بالّي نهار الانتخابات هذا كان صارت باش نكون موجود في بلاد الفرنجة و نحب ننتخب غادي .. السيستام ما يخدمش الشي نو لابا .. دونك لازمني نمشي للإدارة الفرعية و لاّ ودرا آش اسمها .. مشيت .. فاضي شغل

و صلت لغاد ثمّة زوز زنوس في كرهبة لوكاسيون قدّام مقر ها الادارة مناظرهم متاع التجمّع المنحل .. لم الق لهم بالا قال الرّاجل .. طلعت الدّرجات و وصلت ..

 استقبلتني طفلة موش دونيّة بالكل تبارك الخلاّق .. برجولية لوكان هكّة الحكاية نصير نقيّد في الجمعة عشرة مرّات .. ما علينا توّة .. فهّمتها الوضعيّة و هزّتني للمسهول .. انسان متفهّم اما السيستام لا تباركلو طايح بالنسبة للحالات إلّي كيفي .. ان شاء الله يولّي يخدم غدوة .. و خذيت أول "ارجع غدوة" من أول "إدارة" تونسية ندخلها بعد الثّورة ..

كلمة حق و تتقال .. الأعوان برشة فينو و يضحكو في الوجه و يعاونو بالّي يقدرو .. و زادة برشة افيكاس و متفهمين .. و نتمنّى من كل جوارحي اي نعم جوارحي .. ولد الباي عندو جوارح يا للاّ .. انّو أعوان الإدارات التّونسيّة الكل يكونو في المستوى متاع الأعوان إلّي شفتهم اليوم ..

حاجة بركة ... 

علاش كيف يقولو السيستام طايح .. كلهم يغزرو للروتور وي في؟

بلد الأنس والجمال

تونس ... بلد الأنس و الجمال

سبوت  قصير و دلّول من أجل دعم السّياحة في تونس

انشروها و لكم الأجر

ربّيتو بيدي 2

-       السلام عليكم .. سي الهاني معايا؟

-       و عليكم السلام .. اي نعم الهاني معاك تفضل شكون معايا

-       شرطة معاك .. حبينا نقولولك سي أمين بحذانا في المنطقة .. ماذابيك تجيبلو دبشات و تجي تشوفو فرد مرّة

-       كيفاه؟ امين مشدود في المنطقة ... في المنطقــ...

و طاح سي الهاني ما في عينو بلّة .. و الخدّامة الكل دارت بيه .. إلّي يرش في الماء و إلّي يعيّط و الكل ماهمش عارفين شبيه عرفهم دايخ ... حكاية درج فاق سي الهاني اما مازال مرهوج .. طلب من ياسين ولد أختو باش يهزّو للمنطقة متاع الشرطة على خاطر أمين مشدود

كيف وصلو للمنطقة لقاوها ما شاء الله العباد تقول يفرقولهم في الحلوى .. الحسّ و العياط و البكى و كلام من الحزام للحزام و استغفر الله و برّة..

الحاصيلو ساعة باش وصلو لرسيبسيون ... و ساعة باش لقاو أسم امين ...

لرّاس مدنقز للوطى .. بقايع دم بحذى الخشم .. مريول مقطّع .. يدين ورا الظّهر في المنوت .. بارك تحط حيط في بيت منديّة .. و النّفس طالع هابط

-       توكلّو محامي و لاّ ما توكلّوش .. ماهيش باش تتعدّالو ساهلة ..

-       خاطيه راهو .. اوّل مرّة يتشد و زيد ما يعرفش

-       اش ما يعرفش يا سيّد .. باهية أوّل مرّة .. الظّاهر فيك ما تعرفش ولدك .. يا سيدي ولدك تشد بالكمشة يخلع في حانوت .. و زيد ضرب زميل لينا بزلاّط كسّرلو سنّة .. و الله لوكان موش هذي حقوق الإنسان و إلاّ شنوّة رانا قمنا معاه بالواجب و فرحنا بيه بالباهي .. صحّة ليه

-       ياخي عملتو فيه شويّة .. اهو الولد مدمدم و حالتو حليلة ...

سي الهاني طبّس على ولدو باش يحكي معاه .. الولد ولدو أما ما عرفوش .. هذا موش أمين إلّي ربّاه .. امين ولدو متخلق و ما يحبّش المشاكل ... أمين يرضاها يبات مظلوم و ما يظلمش .. شاف في ولدو جثة فيها روح ..

قعد سي الهاني بجنب ولدو تحت الحيط .. و الأفكار داخلة بعضها ..زعمة قصّر في حق ولدو؟ زعمة عمل الخايب في حياتو ش يصير فيه هكّة؟ و امين منين ليه هذا؟ اش لزّو يعمل العملة الكلبة و يطيّح سمعة و قدر العايلة؟ بالك ظالمينو و غالطين فيه؟ اما البوليسيّة باش يتبلاّو على ولدو من دون النّاس؟

-       يا أمين علاش هكة .. اش عملنالك خايب باش تكافينا هكّة؟ حرام عليك و الله حرام .. مانيش وجه حبوسات .. ماحناش متاعو ..

-       نورمال الحي يروّح .. لازمنا نربيو الشرطة .. خلايق و اشكال و يقولولهم بوليسية .. نهايتهم على يدينا ... و مانيش وحدى .. برشة .. الشّعب الكل معانا ..

الدّنيا دارت بسي الهاني ..و زاد يخمم اكثر و مخّو قريب يطرشق: امين ولدو يحكي هكّة؟ وهو مربّيه السّّياسة لا من الصغرة .. ياخي اش صار في مخّ ولدو باش يخمم بالطريقة هذي .. الخلطة .. ما تكون كان الخلطة .. و شكونهم هوما؟ و أمين كيف يدخل للحبس, الشّعب باس يدخل معاه؟ و وينو الشّعب؟ و شكونو الشّعب؟

-       ايا يا سيّد خلّينا نخدمو على رواحنا .. تو تشوفو في المحكمة

-       ...

-       يا سيّد من فضلك سامحنا البرّة ... يا سيّد نكلّم فيك قتلك  سامحنا البرّة

ثورة داخلة في حيط

باسم الله

والله اليوم حبّيت نكمّل "ربّيتو بيدي 2 " لكن ما باليد حيلة أمور تونس و التوانسة ما تعجبش بالكّل.

مجموعات مانيش عارف شكونهي تهاجم في الشرطة و الحرس و الجيش ... الشرطة ضربت جامع بقنابل الغاز ... حرق مكاتب تشغيل و كنام و إدارات و مراكز شرطة ... أحزاب تندد ماهيش عارفة علاش ... براكّاجات في كل بلاصة و عركة بين زوز تولّي عرك عروشات ... مفرخ تخرج في اللّيل يسرقو و يخلعو و يضربو مولوتوف على الجيش ... بوليسية مدمدمين و شعب فادد يحب يهجّ و الأسوام غالية علّي يقدر و على الزّوّالي ...

بالله .. بالّي تامنو بيه ... هذي هي الثورة إلّي العالم الكل حل فمّو من نظافتها و نظافة "ثوّارها"؟

أيّامات الثورة .. وقت إلّي كانت تتسمّى ثورة .. المطالب في كامل أنحاء الجمهوريّة كانت من نوع

-       التّشغيل استحقاق يا عصابة السرّاق

-       خبز و ماء و بن علي لا

-       كرامة حريّة عدالة وطنيّة

-       ديقاج لبن علي و التجمع و الطرابلسيّة

و الأهم من هذا الكل الرّاية الوطنيّة ... كانت ترفرف الفوق ... فوق الناس الكل بجميع توجهاتهم ... شعب واحد ما عرفش الخوف من الديكتاتور و قالّو يا انا يا انت ... و الشّعب قال كلمتو ... احنا... احنا الشّعب التونسي قلنا كلمتنا و بن على هرب

كانت ثمة محاولات غربيّة باش يسمّيو ثورتنا ثورة الياسمين ... و الشعب قرّر انّها تتسمّى ثورة الكرامة... اي نعم ثورة كرامة موش ثورة زيادة في الشهرية ولاّ ثورة الاعتصام

ثورة لأوّل مرّة في تاريخ العرب و المسلمين تقوم من وسط الشّعب من أجل الشّعب .. للكرامة و الحريّة و الديمقراطيّة ... ثورة غيّرت وجه العالم و نظرتو للعربي بصفة خاصّة كمواطن محقور و يحب شكون يحقرو

بعد نجاح الثّورة ... اي نعم نجاح الثورة على خاطر كيف بن علي هرب النظام طاح كيف الأفعى و بوادر الدّيمقراطيّة بدات تظهر بوضوح في الأيّامات الأولى بالقصبة 1 و القصبة 2 كيف الشّعب يكون ملتف حول قضيّة تهم التّوانسة الكلّ من غير اهداف شخصيّة ضيقّة ..

دولة خلافة ... نظام إسلامي ... لا لقانون الأحزاب ... دولة علمانيّة ... الرّاجل ياخو حارة نساء ... نص نص في المجلس التأسيسي ... فيلم من الحيط .. الإعتداء على المقدسات ... يا ولادي وين ماشين؟

أعتصامات في كل بلاصة على أي حاجة ... و الله سمعت باعتصام ضد اعتصام اخر ... بلاد واقفة ... اقتصاد كعبة لا ... التّوريست هربو و السّلع الغذائية ناقصة ... نعملو اعتصام السّبسي ديقاج ... نعملو اعتصام اولاد المنطقة ما يخدموش نسكّرو المعمل ... نعملو اعتصام مالقينا ما نعملو ... و المصيبة  ها المعتصمين يحكيو باسم الشعب ... بالله إلّي ناوي يعمل اعتصام يحكي على روحو و على الحارة بِزْوِش إلّي معاه و باسمو و اسم الفرازيط ألّي بجنبو... الشّعب كلمة كبيرة ... وقيّت باش نخدمو بلادنا و نقومو بيها ...  

حاجة اخرى ... مانيش ولد أي حزب سياسي بصّاص ... و إلاّ ولد السبسي ... و لا داخلية و  لا خارجية ...و لا ولد الرجعيّة الحداثيّة ... انا ولد الباي ... ولد الشّعب التّونسي الّي صنع امجادو بيدّو ... إلّي ما يشريه حتى مخلوق ... و الجرذان و الفئران إلّي ضهرت بعد الثورة مآلها الرّجوع للجحور و الأنفاق و مزابل التاريخ.

في الأخير ... شكرا لكلّ واحد غرّر بأولادنا كدروع بشريّة خدمة لأغراض سياسية شخصيّة ...شكرا لصفحات الفايس بوك إلّي تدعو صراحة لقتل رجال الشرطة و الأمن عموما ... مبروك عليكم وسّختم ثورة الشّباب ... ثورة أولاد تونس ... ثورة الكرامة ...

ربّيتو بيدي 1

-       هذا سي ولدك مازال راقد؟ ماهوش ناوي يفيق؟

-       شبيك عليه على الصّباح؟؟ خلّيه راقد المسكين روّح موخّر البارح ماهو كان في عرس ولد حومتنا ... العاقبة عندنا ان شاء الله نفرح بوليدي و نعملّو ما يعمل الباي لولدو

-       منين باش تعملّو و الطّفل لا صنعة لا صنيع ... بالحرام إلاّ ما نحكي معاه و نفهّمو قدرو و إلّي يصير يصير ... كثّرلها راهو

-       ايجا كمّل قهوتك

-       ما حاشتي بقهاوي .. شي يسدّ النفس .. و قلّو يمضمض على المصروف زادة ... لا حول و لا قوّة إلاّ بالله .. لا حول و لا قوّة إلاّ الله

   أمين هو الولد الوحيد في الدّار و بعد زوز بنات ... بوه, سي الهاني, ما كانش يدللّو برشة ..حب يعمل منّو راجل و يشد خدمة باهية و بالقليلة يشدّلو الدّبّوات. أمين ملّي خذا الباك و امورو ما بقاتش تعجب بوه .. يروّح موخّر برشة ما يمشيش للفاك متاعو و اللبسة و اللّوك زادة تبدّلو.
   سألو قدّاش من مرّة يحبّش مصروف و امين يضحك و يقلّو حطّهم عندك ... ولدك راجل و يعرف كيفاش يطيّر الفرنك

   الفاك طردت سي أمين على خاطرو بشلاغمو و يفسكي ... موش مرّة و موش ثنين ... ز من حيمنها أمين شدّ بحذا أمّيمتو لا خدمة لا زدمة.

   من صغرتو و امّو تعيطلو أمّونة و ساعات تعيّطلو مونة ... كانت تكسي فيه روب خواتو القدم و تشريلو  اي حاجة يطلبها .. خايفة عليه من لعين و ما نعرفش شنوّة اخر

-       قهوتي حاضرة؟

-       تبارك الله على وليدي .. زين و عين .. العاقبة عندك أمّونتي.. بالطبيعة حاضرة القهوة .. تحبّش حاجة أخرى؟

-       لا شي سافا تو.. اسمع .. الهاني خلاّلي عشرة لاف و إلاّ جبد بيّا زادة

-       يجبد بولدي العزيز الغالي ... هاك إلّي مازال ... اهم العشرة لاف شيخ روحك .. اما لازمني نقلك حاجة .. بوك راهو باش يحكي معاك في موضوع الخدمة ..

-       ملاّ مرجة ... ما يفهمش ما ثمّاش خدم .. قتلو نخرج البرّا ما حبّش ... اش نعمل؟ نخدم في معمل و إلاّ ما نعرفش فاش.. يا نخدم خدمة مرتاحة و سلار باهي يا موش لازم ... شبيه هوا ولد عايشة عمتي خير منّي ... كرهبة و دار ... و بابا يحبّني نخدم تحت ياسين ولد عمتي نهز و نطلع في القوايل  و الشّموس

   امين جاه تاليفون زق قهوتو و خرج ... حتّى واحد ما يعرف عليه وين يمشي و إلاّ مع شكون يخرج ... يقوم الصبّاح .. بالطبيعة بوقتو هوّ .. و يرجع عقاب الفجاري. الوضع هذا موش مساعد سي الهاني خاطرو يحب يشوف ولدو متهنّي موش متواكل على النّاس. في المرّات القليلة إلّي يتقابلو فيها ديما يتعاركو .. موش على المصروف .. هذي حكاية سكوندار لسي الهاني .. يحب ولدو يخدم و يتحمّل المسؤولية كاملة ..

أمين عندو وجهة نظر بعيدة برشة على بوه ...

آخر إبداعات القذّافي

الصّورة هوني ابلغ انباءا من الكتب .. ها القذّافي باين فيه يعيش في أيّاماتو الأخيرة

أما " و الجرذان " دلّلولة بااارشة

نهيّر في المعمل

ليوم نهيّر في المعمل ... الماشين البرانسيبال واقفة و السّخانة ما يتحكاش عليها ... عاد كانت فرصة الواحد يتعرّف على الخدّامة و يشوف مشاكلهم هههه ديجا ما عندهم كان المشاكل ... غير تقلّو شبيك يبدى ما ياقف : القضيات برشة و الوقت ياسر و البريم شوية و ظروف الخدمة صعيبة و .. و .. و المعمل الفلاني خدّامتو شايخين ..

ايا عاد ثم خدّام باينة فيه بحكم العمر متاعو الخبرة في الخدمة و الدّنيا ... ترتاحلو كيف تشوفو .. بدا يحكي على المعمل و على الخبرة متاعو و يعطي في الاقتراحات باش الوضعية تتحسن ... و هذي الاقتراحات كان يقول فيها بصوت خافت برشة ما تنجمش تسمعو مليح ...

و الحديث يجيد في الحديث ... الخدّامة ما يخلصوش مليح ... ناس في الكليماتيزور و ناس بحذا الشّوديار ... شي ها الثّورة ما صوّرنا منها شي ... الخدّام خدّام و العرف مازال عرف ... النّظام هذا لازمو يتبدل جملة ...

كيف تسمع كلام كيف هكّة .. ما عندك كان تتبسّم ... بالخصوص كيف تبدى محسوب على العرف ...


-       العيب راهو فينا احنا .. نشوفو في العيب و ساكتين ... اكثرش ... كلام ربّي ماناش نطبقو فيه .. بالطّبيعة ربّي باش يغضب علينا .. يجي يقلّي ما تصلّيش وقت الخدمة .. لا انا ربّي يباركلي في خدمتي لا مولى المعمل في فلوسو .. ناس تلزّك بالسّيف على معصية ربّي

يجبد نفس من السويغر الّي في يدوّر فيه بين صباعو خايف من عرفو لا يفطن بيه ...

-       تي هو الحاكم يلزّ فينا باش نعصيو ... ربّي مصرّحلنا في المرا الثّانية و الثّالثة و الرّابعة... و الله سمعت إلّي الأصل زوز .. كان في حالة خاصّة باش تاخو وحدة .. معناتها الواحد حارمينو حتّى من حقو الطّبيعي .. معناتها نمشي نعمل معصية أخرى باش نبدّل الجو؟؟؟

هوني تجيك الضحكة حتّي لوكان موافقو في كلامو ... تو كي الخلاص موش باهي و ما يكفّيش .. كيفاش يكفي زوز عايلات و ثلاثة و اربعة؟

-       باهي كيف المرا مسكينة تمرض و ما تنجّمش تقوم بواجباتها الزّوجية ... الثانية و الثالثة موجودين ... و الراجل ينجّم يقوم بمرتو و هو موش ناقص

و المرا كيف راجلها يطيح اون بان؟ تقوم براجلها و أجرها على الله و لاّ شنيّة الحكاية... هوني تبدى تضيع في الخيط بالسّيف من عليك ..

-       احنا راهو كفرنا بنعمة ربّي ... لا يكلّف الله نفسا إلاّ وسعها... أما الدّنيا صعّبناها على رواحنا بها الوجوه الراكبة على الثورة .. قالّي قتلك جماعة فرانسا ناس كفار ملحدين جايين بالعلمانية شنو شنو هي الحلّ للبلاد ... باش يخرّبولنا الاقتصاد .. الإقتصاد  راهو كان بيع و شرا .. البيع و الشرا حلال ...

اتعلموها و تو يجي نهار و تقولو ولد الباي قالها : إلّي تلقاه راكب على جريدة .. قلّو مبروك الحصان

عم صالح 2

عم صالح ما عندوش أولاد .. بالنسبة ليه الأولاد و العرس موش متاعو.. حكايات متاع واحد ما عندو ما يعمل يزيد يثقّل روحو بالمشاكل ... هو ثاني حداش في العايلة .. بوه لاب

اس بيه و امّو من عايلة زيتونية ..تربّي من صغرتو على المشية للجوامع و ترتيل القرآن على الموتى

-       يا سي صالح, شبيك ضربت الراجل؟ و أش مدخلك من أصلو للمسرح؟ ماك شادد الجامع و ما كلمناكش ... و القهوة عملتها و ماكلمناكش

-       خويا المنذر .. نرفزني و عايرني خاطرني ماقريتش و ما عنديش شهايد

عم صالح دخل للمكتب و عمرو تسعة سنين ... وكان ولد حومتو المنذر معاه في نفس القسم أما شيطان برشة ... كر على عم صالح الفرخ و علمو التكروري و أعمارهم ثناش .. عم صالح وليدها بالضبط من الصغرة ... بعمرة ما تشد يتكيف .. و كيف يغيب في المكتب ديما شرعي و ربّي يخلّي الموتى في الحوم

-       ايه موش معناتها تضربو ... وزيد هذا خرق للسّراح الشرطي متاعك .. معناتها باش ترجع للحبس

-       الحبس؟ علاه خاطيني .. راني مانيش متاعو... كبرت عليه

عم صالح محكوم بثنين وعشرين سنا حبس.. عدى منهم سطّاش و خرج حسن سيرة: قتل غير عمد و استهلاك و ترويج مادة مخدرة و محاولة الإعتداء على قاض أثناء سير المحاكمة

-       يا عم صالح فيبالي تعرف قانون أكثر منّي ...

-       انا حبّيت ندعّم الثقافة في بلادي...تحبسوني؟ موش كيف كنت معايا ...

-       كل حاجة في بلاصتها يا سيّد .. احترم روحك

عم صالح و المنذر صحاب صغرة و يعرفو بعضهم مليح ... ياما قعدات و شيخات و غنا و سهريّات و تفريك و موبقات

-       شنية هذي الحكاية متاع مؤذن و سمسار كاستينقات؟

-       نعطي في حق ربّي و نعاون في الناس بلّي نقدر

-       تعاون في الناس؟ ميا و خمسين دينار باش يعدي الكاستينق و في صورة النجاح ثلاثين بالميا من اوّل كنتراتو ... و قهوة شاريها دوب ما خرجت ... هاك لاباس بيك؟

عم صالح يحب كل شي في بلاصتو.. الخدمة خدمة و التطوع تطوع ... الكاستينق تدوير راس و فيها الدزّة ...

-       و الجامع و الاذان؟ الناسس سمعتّك تغنّي ساعات؟ وين الإحترام للجامع؟

-       ماكش باش تعلّمني الاحترام ...باهي والله الحنوشة تحترم قالك... هاك اناشيد دينية لترويح عى النفس

عم  صالح رجع للحبس ... الكاستينق رجع من غير أكتاف عم صالح ... و المنذر... رئيس مركز الشرطة فك اعتصام الخلايق ...

-       يا ولدي ... موش هكة تعمل باش تقابل الحاكم.. لازمك تتذبل و تبينلو انك مازلت مرهوج م الطريحة إلّي كليتها ماكش قاد تدغر

-       يا عم صالح زعمة تتعدى؟

عم صالح يعلم المساجين التمثيل و الأقناع في الحبس ... خمسين دينار الحلقة التكوينية و شطر باكو كان الفيلم ماشى مليح مع المسجون ...