عاونوه بالدز 3

أيّا مرحبا

كيما قلتلكم قبل كل ما ناخو ليزانفورماسيون نقوليلكم

هي كيف شعلت بين الكومينيست والاخوة المسلمين شكون باش يلقن الأخ المنتحر الحي الكلمة قبل ما يتوكل على روحو, الاخوة المسلمين قاموا بالغلطة الكبرى وقت استعملو مصطلح "الرفيق الأعلى", الكومينيست كبشو وقالو كلمة "الرفيق" تابعتهم .. حاصيلو شبكت برشا بيناتهم.

 أما تحلت كيف قام الأخ المنتحر الحي يفهّم فيهم بالفلاّقي أنو يقصد يعاودو يصوروه مع المتطوّعة الفيمينيست موش خطاب بالحق, على خاطر يفضل أنو العملية هاذي تكون تحت تأثير بنت العنبة, و هكّا الحشمة تطيرلهم و الأمور تتفرهد.

سي العربي – موش باعث القناة إلّى على فكرة نتوجهلو بالشكر - الله يهديه يموت على الزيادة, وسي العربي الله يتولاه ولد عم هو و اليهودي معناتها ما يحبش الخير حتّى لروحو, قام المدير العام متاع جماعة الصحة الإزديادية, و هوا في الأصل نايب مدير عام الزبراطة قال بللي عملية إعادة التصوير لازم تكون بروتيجي و ما عندهمش الدروع الواقية اللازمة .. دونك تلزّو و جابولو متطوعة أخرى...

الإخوات الفيمينيست تغششو و قالو باللي هوما قدموا أكثر من غيرهم لإنجاح العملية و هو ما سينجر عنه ثورة نسائية ليلية في الشوارع و الطرقات الترابية في الصباح و العشية وقت القيلولة و عند الغسق و الغلس و الصبح ولن يركعن ... ايه نعم لن يركعن

النّاسيوناليست ما عجبهمش الكلام هذا, شدّو و خينا المنتحر الحي يد و ساق, أو بالأحرى الزّقفونة, و قرّرو يطيشوه مهما كانت الكونديسيونات ...

 فجعة يتدخلو الحنوشة, و يقالولهم أنو العملية هاذي غير شرعية, و تسمى قانونيا ب"تونتاتيف دو سويسيد اون بيبليك" .. بالعربي "محاولة انتحار في الطريق العام"

الله يرحم والديهم أفراد سلاحف النينجا او ما يعرف بالفكارن المتطرفة,صحيح لحقو موخرين أما سمعو الحنوشة اش قالت, و ردو عليهم أنو الواحد كيف يموت من أجل الوطن متاعو حاجة باهية و يكرموه من أجلها, علاش ممنوعة كيف الواحد يموت بور سون سوا مام ..

هوما قاعدين يتفاضو معا الحنوشة قام واحد دز المنتحر الحي من فوق العمارة طاح مات.