+ سي المخرج...يا سي المخرج بربّي لحظة
- وي وي ... تفضّل يا مدام اش تحب ... و شكونك باش تحكي معايا هوني قدام خلق ربّي؟
+ امان امان؟؟ نضهرلك مدام يا سي المخرج؟ راني مازلت شبابة ... باهية حكاية مدام هذي
- مدام انسة هجالة معلقة طايحة لوف كلو بغلي ... هات الصحيح تعمل مزيّة اش تحب منّي في ها النهار الأحرف
+ انا ممثلة شابّة و فرصة لا تعاد, ديجا اسمي فاتن و يعيطولي سعاد ... اوكا عندي مدّة نفركس على الفرصة متاعي لين طحت بيك :هاك مخرج شباب و عندك في الإبداع ما تقول ... و زيد سيدي رمضان على الابواب كي الخطّاب قلت عاد ندبّر دور
- يا بنتي شبيك سافا في مخّك انت؟ بربّي قلّي شكونك انت؟ و زيد سكّرنا و شطّبنا الكاستينق ... و نزيدك :في عمرك لازمك تشد تركينة و تلبس لبسة تليق بيك و تخطى المبدعين ... راك موش متاع تلفزة عزوزة كيفك متصابية
+ صحيحة كبيرة في العمر اما و راس الحنينة يا عرفي مازال عندي في البلدي ما نورّي ... و عندى موهبة و إلا ثنين نجّم نعمل في مسرحية كومبلي وإلا حاجة من هاك الكلام الصّعيب متاعكم
- كانش يسبّوني و يسبّوك ... براس إلّي يعز عليك اني راني موش ناقص ما تزيدش تهبّلني ... ايا تعمل مزية خفّ شوية ثمّ شكون جاي يركش بحذايا
+ تي شبيك ما تدزش فازتك و تجربني و تقبلني؟
- تفدلك؟ بالله اش فيك ما يتشاف جلد و اربعة كيلو عظام هع
+ امان ها مخرج؟ ولّينا ب تسميع الكلام؟ و تقول على روحك مخرج عالمي و تعرف تخدم؟ تجيك فرصة كيفي للطاولة متاعك و تقول لا؟ نورمال ياخي؟؟ اسمع شوف راني حتّى كبيرة نجّم نخدم دور الأم الحنينة و إلا الشمطاء بالرغم إلّي زيني ما يتعاودش... تي حتّى دور العزوزة القافزة ...كيف هاك الفيلم متاع درى شسمو
- آآآآآآآآآآه
+ شبيك ها وخي ماهو لاباس؟
- لاباس لاباس ... شوية سخانة ربّيي و شويّة عوج عبادو... ملا كيفش قتلي؟ عزوزة قافزة؟
+ وي اكزاكتمون ... سبيسياليست راني ..من كثرة ما شفت عزاوز حفضتهم شراب ميّة
- ايه هذا البليس إلّي حاشتي بيه ... شفتو الحيط إلي غاد .. برّا اطلب الفلوس تحتو حاشتي بطلاّبة نحب نشوفك في أكسيون ريييل
+ نعم نعم سيدي... نطلب ؟ هاك إلّي مازال عليّا في عمري ... اسمع قول لا أما خلّّينا بالقدر اوكي يا شسمك؟
- دبّر راسك انا هاني قتلك و انت دليلك ملك
+ اسمع شوف كلمتين خفاف نظاف ... يا تعطيني دور يا نقول فيها اوووووووه و نلم عليك الطامّة و العامّة و نعمل إلي الرّجال ما تنجمش تعملو ...
- لا عاد زادو على ما وصّاووك ... شبيك شتحب؟
+ تخنقني و الله إلا ما نهبطلك أولاد خالاتي و يشوفو معاك ها العملة... سيّب هبط يدك خنقتني سيّب تي سيّب ...
رنن رنن رنن رنن
* تي شبيك ما تهزش؟
+ هاههه هاههه هاههه ... ملا فجعة ... واحد ما يسواش خانقني
* اش ثم زادة ... ماهو لاباس؟
+ لا لباس .... حب يعملّي براكاج ينحّيلي ذهبي و خواتمي ....
Aucun commentaire:
Enregistrer un commentaire