نعود.. و بكلّ حزم

سين سؤال : علاش رجعت نبلوغي؟

جيم جواب : مالقيت ما نعمل ....

تو قريب 7 سنين ما كتبتش في البلوغ .. 7 سنين يا بوقلب

7 سنين خدمت فيهم 6 خدم في 6 شركات في 4 بلدان

خدمت في تونس و تمرمدت بالباهي

ضربت البطالة و تمرمدت بالباهي بالباهي

مشيت للأفريك و خدمت و تفرهدت الأمور

و رجعت و هجيت لبلاد الفرنجة و المرّة هذي عند ولاد الحاج

7 سنين تعلمت فيهم برشة حوايج و شفت فيهم ألف حاجة و حاجة 

تعلمت لوغة جديدة مالصفر و زوز لوغات شوية شوية 

تعلمت خدمة جديدة .. اي نعم تعلمت خدمة جديدة موش في دوماني جملة و حاشاني مالعين ناجح فيها ونلوج في ماخير

تعلمت أنو أنا موش أنا .. أما لقيت روحي

شفت الكرز المديكين و شفت الكرز المحترمين

شفت المزمرين الصحاح و شفت المزمرين المديكين

شفت المزمر يبيع في بنتو .. و شفت الكرزة يبيع في بنتو

شفت الطفلة ب 3 دينارات و في نفس الوقت حارة قارص ب 50 دينار

شفت ناس ما تعرفش فلوس و ناس تمسح في ترمها بالفلوس

في التحاصل معناها راجع نبلوغي

راجع نكتب لروحي قبل كل شي

راجع نحكي حكاياتي كيف مانحب 

كل حاجة نكتبها باز عشتها ولا نحب نعيشها ولا جيست هكا ..نحب نكتب

و نكتب كان بالتونسي

مرّة بالتصويرة و مرة بفيديو و مرة بسيدي وسيدك و بكلنا أسياد

و أحلى حاجة .. رجعت نكتب ..و موش كان نكتب 😁

شكرا باعث الطيران

عيدكم مبروك و سنين دايمة ان شاء الله

المدّة الفايتة الكل ماعينيش في الكتيبة .. خرنان و خلوقي ضايقة قال الجريدي .. فديت من بلاد الفرنجة و مرج بلاد الفرنجة و فلوس بلاد الفرنجة .. قلت اوّل ما تجي الفرصة نطلع لتونس الغالية و صفاقس الحنينة .. و هاك آش كان .. الرحلة بدات من باريس في اتجاه صفاقس ديراكت .. في الطّيارة مرا راكبة بجنبي تدعي بالخير على باعث شركة الطّيران الصفاقسية يرحم والديه و يفرحو بصغارو و يرّاه هلال و وين يقبّل يربح و بَيْثَرَة في عيْن عدوه الأيْسَرَة ..

-         يا مادام رانا راكبين بفلوسنا

-         و عاد شبيه ماهو باعث شركة الطيّارات وِلدَنا .. و المال إلّي ماشي لسّدرة .. زَيْتونِتنا أولى بيه

-         تي حتّى الشركة الوطنية عندها رحلات باريس صفاقس و بنفس الأسوام

-         لَيْن هاكي لَيّن .. و طيّاراتها قدِم برشة و ديما روتار .. احنا تبارك الله علينا تقول المان و لاّ جببنة (جمع جبّوني أي ياباني) ديما في الوقت

ساعتين كاملين عدّيتهم عامل جو مع السيّدة هذي و عامل بون كيف ... الطيارة جديدة أما مليانة برشة فكرتني بباب الجبلي ليلة عيد .. و الطيارة على ماهي مليانة و فيها حس تقول تاكسي بالبلاصة على الطريقة الصفاقسية ..

ايا يا سيدي هبطنا في مطار صفاقس نصف الليل و الحال رمضان .. الناس ساهرة و الفن يضرب و جو باهي

مشيت للبيست نستنّى في الساك متاعى و شفت كوان صغير متاع فريشوب ,, قلت مافيها باس ناخو شويّة شكلاطة "متاع فرانسا" ..

انا واقف نستنّى باش نخلّص .. جاني راجل كبير في العمر و بدى يحكي هو و الحاجّة متاعو على حاجة يحبّو يشريوها و ماهمش عارفين شنية بالضبط .. قلت بيني و بين روحي زعمة نزدم و نعاونهم ؟؟ و هاك الدودة متاع التنسنيس غلبت ..

-         ياحاج تحبّ نعاونك في حاجة

-         و الله ماذابيّة .. نحب ندخّل معايا كولونيا و مانيش عارف قداش عندي الحق من ليترو

-         يا حاج الكولونيا تنجم تدخل برشة

و هوني يجبدني على جنب و يحكيلي في وذني بالشويّة

-         موش كولونيا متاع ريحة .. حاشاك و حاشا ها الشهر عندي صاحبي ربّي يهديه موصّيني على كعبتين فودكا .. عاد قلت ناخولو بخاطرو .. و ماك تعرف الحاجّة معايا و ديما تشري الشبوك ..

-         يا حاج ايا طيحك ربّي بولد حلال هاك الّي بالضبط ... تحب جيست نشريهملك و إلا ندخلهم معايا زادة

-         كان تعمل مزية دخلهم .. لوكانا لمرا تشدني بيهم مشيت

-         على شرط .. نكمل قضياتي و المادامة متاعك تاخو الساك متاعي

الماخذة بالخاطر باهية و خصوصا في الشهر الفضيل ... الراجل روح بالقضية متاعو بعد ما سمعت وسخ وذني من الديوانة شنو شنو كيفاش ندخل منكر شريتو من فريشوب صفاقس للبلاد في رمضان ..

تحبّو تعرفو الساك اش فيه؟ ههه شهر فضيل عيب و الله

في يوم الجمعة ..

في يوم جمعة قبل وقت الصّلاة بدرجين هزّيت روحي و مشيت نعطي فرض ربّي .. يا سيدي الجّامع براسك فارغ .. حويرتين و حارة .. عاد مشيت كي العادة للصفّ الأوّل فإذا بأحد "الاخوة" من مطلقي اللّحي و حافّي الشّوارب يطلب منّى باش نوخّر على الخاطر الصف ريزيرفي ... و الله فرحت قلت آهو النظام ولاّ لوّح  ...

الخطبة بدات .. الإمام ما نعرفوش أوّل مرّة نشوفو .. قلت زعمة تبدّل وقت انا في بلاد الفرنجة .. ربع ساعة الإمام يخطب و الله مافهمتش شنو الموضوع اما الزوز "الحكايات" حسب ما خبّره أي الإمام السلف آهوما

-          حدّثنا السلف أم رجلا يابانيّا دخل الإسلام, الله أكبر, فحجّ ثلاث مرّات فلمّا عاد إلى الصين قام بترجمة القرآان من العربية إلى الصّينية, الله أكبر, قاب ب ارسال ابنه البكر إلى مكة ليدرس الدّين و  لما عاد الإبن إلى اليابان بعد أربع سنوات وقع له حادث في الطريق ف مات على البلاصة .. و من قوّة الإيمان قام الأب بإرسال الإبن الأصغر إلى المدينة ليدرس الدين .. الله أكبر 
 يا ولدي ثمّ حويرة ولاّت تكبّر و تبكي ... تي تقول فيلم متاع منوحة

-          هل تعرفون الخنساء .. هي شاعرة و العياذ بالله .. مات إخوها فبكاتو طول عمرها .. هاك علاش النساء ناقصات عقلا و دينا .. ايّا عاد دخلت للإسلام مات اولادها الأربعة في الجهاد ياخي سألوها الناس علاش ما تبكيش عليهم قالت هوما شهداء .. الله أكبر .. الله أكبر
الفيلم تواصل متاع التكبير و البكى

الجماعة إلّي في الجامع ولد الحومة في مكثورهم كان جماعة النواح و التكبير و اللافت انهم قميص تحتو سروال سيرفاتمون محشي تحت كلاسط .. بالنسبة ليّا مانيش مستغرب اللبسة هذي متعوّد بيها في بلاد الفرنجة وقت نمشي للجوامع .. اي نعم ولد الباي ساعات يهديه ربّي و يمشي يعطي حق ربّي بالرغم من ميوله إلى دع المساجد للعباد تسكنها..

ايا عاد نرجع الإمام بدا يكسرّلي في الباطاطا .. ما استشهد بحتّى آية قرآنية و لحتى بحديث نبوي .. كله في حدّثنا السّلف و شاد في النساء لازمها تشد الدّيار و الصّغار لازمها تقرى العلوم الشرعية و تتفقّه .. و عطانا مثال مفحم

-          حدثنا السلف عن الثقاة ان قائدا لجيش إسلامي ذهب لمقارعة الكفّار من اليهود و النصارى فاعترضه بحر عظيم لم يقدر الجيش على العبور .. فصلّى ذلك القائد لربّه ركعتين .. فعبرت الخيل البحر .. الله أكبر
لجماعة وقفت و تكبّر و تعيط "حي على الجهاد حي على الإيمان" وانا طرشقت بالضحك لين لإخوة حافّي الشوارب سكتو

هو في الحقيقة ضحكت على زوز حاجات الاولى كان ها القائد- برّا لوّج شكونو و اسم لمعركة و بلاصتها و العلاقة بين الكفار و اليهود و النصارى و هات من هاك اللاّوي-  صلّى ركعتين الخيل تعدّات البحر – هوّى سيدنا موسي شق البحر بقدرة الله باش تعدّي و هاذم ديراكت- قلت انا نصلّي اربع ركعات نلقة روحي في بلاد الفرنجة من غير تعب ..

الحاجة الثانية إلّي ضحكتني هي العلاقة ما بين النساء و الصغار و القائد و الخيل و البحر ... بالرسمي لبلابي بالشامية قال هاك الفرخ ..

المورال أنو حرية التعبير بالرسمي مكفولة .. و العرض الفوق ...

طرطور المولد

سلام

عندي مديدة ما كتبتش في ها البلوغ المحنون ... و اليوم نهار مولد و لافايد بيه ... حاسيلو مولد مبروك على الجماعة الكل و إن شاء الله تونس و التوانسة بألف خير و من حسن إلى أحسن

اليوم الناس الكل فرحانة بالعصيدة إلّي كيلوها البارح و الباريود الفايتة أغلى من العلّوش و الهبرة البقري ... تقول علاش ؟ انا نقلك علاش...

الطستيكة البقري في البلاد ولاّت بلاش ... البرنوس طاح قدرو ... تونس يا دين الزبب طاح قدرها ... التونسي مابقاش عندو قدر ... تي قوّات الأمن تتخطف و نورمال ...  تتباكاو على الزقوقو ... تي دين والديكم أهو طلع الإحتفال بالمولد بدعة و حرام سافا هكّة؟؟

نجيو للرّسمي

سي الطرطور أو ما يصطلح جزافا و بهتانا و يقولولو ''رئيس الجمهوريّة'' هاك المنصف المرزوقي قام بقطع العلاقات مع سوريا ... دين والديه أش مدخّل ربّو في سوريا ... الناس جواعة و البرد ياكل فيها في  القصرين و تالة و الكاف و جندوبة و عين دراهم و الطرطور لاهي بزنبور أم سوريا ...

تراه يحل ربّ فمّو على هاك القطعي الإرهابي شورو الكلب إلّي يحب يقص يدين و سقين المعتصمين من خلاف و دز في ''ربّي قال'' .. زنبور أمّهم واحد واحد ما أرذلهم و ما اسقطهم  ..

الصندوق جابهم ... موش صحيح ... الصندوق عطاهم أسبقية نسبيّة أما التواطؤ و الموش رجولية حطّتهم غادي .. الجري على المناصب إلّي نشوفو في نتايجو أهو التكتل على قريب باش يدخل في خبر كان و المؤتمر من أجل إضحاك الجمهورية على نفس الثنية

النهضة باش يقع الدخول بي أمّها عن قريب بعقد زواج عرفي ... حريّة صخصيّة قالت هاكي بادي متاع المرأة ... تي أهو التجمع رجع و يضرب في ضرب الصح ... ميليشيات – في معضمها تجمعية سابقة – تتجول و تقول دولة في دولة حتى قوات الأمن ما سلمتش منهم في الإعتصام

أشكال, مع احترامي لنضالاتهم مان توجدت بالطّبيعة , تحب ترجّع تونس ولاية أو قطريّة أو اي حاجة أخرى بخلاف دولة ذات سيادة ..

السلاح داخل وسط البلاد و هاك الحكومة تقلّك فزاعة ... يا سيدي عنّا خمسة من خيرة الخيرة متاع جيشنا و امننا تضربو بالكرتوش متاع الفزاعة ... و إلا كيف القناصة .. اشاعة ؟؟ مواطنين ماتو ضربتهم الإشاعات ؟؟؟

لوين ماشية البلاد؟ الأكتاف في كل بلاصة و وصلت لحد الوزراء – ربّي يوزّرهم واحد واحد – و المستشارين ... تي آهو الباجي طلع رجلة ... تي بن على أنظف من الحثالات السقّاط

و لي عودة 

اي نعم زنوس

جمعتنا الغربة و فرقتنا الأحزاب ...

 فهمتها كيف حكيت فازة ...  فازة ضحكت الناس الكل كان سي وخينا و لفّ لفّه ..

قاعدين ملمومين في بلاد الفرنجة .. إلّي هي بالطبيعة بلاد كفّار عند البعض "المتأسلم" .. و مانيش عارف كيف ها "المتأسلم و لفّ لفّه" يعرفو إلّي بلاد الفرنجة كفار آش مجيّب دين والديهم هون .. ما علينا ... بديت نكرّز

عاد قلت قاعدين ملمومين نحضرو في سهرية باش نعرفو بالتقاليد التونسية من تراث غنائي و ماكلة و لباس .. الحديث تهز حول الانتخابات .. الفكرة بسيطة كل حزب يقدّم روحو في عوض نقدّمو التراث متاعنا على خاطر ثمّ حاليا صراع هويّة في تونس

جبدت حكاية من الحيط :

-          اهلا ولدي ولد الباي ... الباي الأكبر معاك .. و الله حاير يا ولد بنتي ... نحب ننتخب النهضة و ما عرفتش شنيّة شعارهم ..

-          شعارهم النجمة .. اوكا ثبّت معايا مليح .. النهضة في العلالي و النجمة ديما الفوق

-          يعيشك

الجماعة بكلها ضحكت .. كان زوز زنوس , اي نعم زنوس ... زنس منهم قام يعيط

-          فرحان بروحك .. تخلّي جدّك ينتخب كفّار .. اثم هذا في رقبتك

-          يا ولدي رتّح روحك .. الحكا...

-          لا حكاية لا والو ... القطب متاعك كفّار .. تعرف أش يقولو؟ اخر حاجة طلعو بيها يحبّو الدولة تتلها بأولاد الحرام و يعطيو الزانية 500 دينار في الشهر ... نورمال ياخي ..

-          يا شسمك .. موش هكّة الحكاية ..

-          ما نسمعكش ... ربّي قال ارجمو الزانية موش اعطيوها 500 دينار .. تنجم تجي قدّام اش قال ربّي ...

الحوار الأحادي كان طويل شوّية .. المعلومات بكلها من باجات الفايسبوك .. و كل منهو يقول لا كافر

الحقيقة الدخول في جدال من هذا النّوع موش جوّي .. بالخصوص مع "متأسلم تكفيري في بلاد الفرنجة" .. يخلّيتو يكمّل كلامو كيف ما يحب ... هزّيت روحي و روّحت , مام قبل السهريّة ما تبدا ...

رهوط و زنوس كيف هكّة موجودين .. المشكلة موش الراي الآخر مرفوض .. أما حتّي الفدلكة ولاّت موش باهية – باش مانقولش حرام –

حريّة التعبير بالنسبة ليّا ماهياش في خطر .. حريّة التعبير قاعدة تموت , تحتضر .. و نجم نقول كلام كيف هكة كيف نشوف "زميل" يفكر بالكيفية هذي و هو يسمّي روحو متفتّح ...

نرجعو للموضوع نهار 23 جانفي الجاي "انشاء الله" (كيف ما يكتبوها أهل العلم الجدد)

الشعب غرق في الماء

الانتخابات كملت و النتائج الوقتية طلعت و الشعب غرق في الماء

النهضة بتسعين كرسي بالطبيعة كان قعدولها تحب تعمل حكومة و بدا الشيخ راشد في زيارة راعي الديمقراطية عاق الوالدين متاع قطر ... و بدا يحكي على مجلّة الأحوال الشخصية و كفالة "اللقيط" و تعدد الزوجات ...

التكتل قرر أنّو يتكتّل مع أي واحد يعمل حكومة... جماعة تتكتّل بالطبيعة.. و الدنيا مع الواقف ... أوكا شوّية لعب بمصطلحات "ندخلو في حكومة وحدة وطنية موش حكومة ائتلاف وطني"

المؤتمر إلّي حط العصا في عجلة اليسار متحالف مع المتحالفين و دز في لوغة أحنا مزمرين

ميّة و الشابّي دوروها معارضة بالرغم إلّي هوما حياتهم بكلها معارضة ...

قاهرني كان هاك ولد الرّياحي مازال يحب على فلوسو ...

الخطاب السياسي التونسي امتاز بالركوب على الأحداث ملّي بدات الثورة و توْ ظهرو السياسيّين على حقيقتهم : نحبو الكراسي و المجلس يا مواطن اعطينا صوتك ..

بعد الحنّة التاريخية – أو ما يعرف بالصبع الأزرق- نهار الحمّام ها الأحزاب ولا واحد فيهم نطق ... مناطق بالخصوص المزمرة الماء فات فيها ميترو و نص و مواطنين ماتو و أراضي فلاحية مشات و الرهوط لاهية كل واحد يجبد من شيرة ...

ما نحبّش نغلط في الكلام – موش وقتو توّة – المواطن يحب كرامتو و يحب شكون يتلها بيه و بعيشة صغارو موش نعرسلك بأربعة و حكومة خريان كيوف وطني...

المشكلة أنو حزب جايب كان حق الفيتو يحب يحكم ... و الجماعة تقسم و المواطن بالحق غارق للعنكوش

البارح فركتها على نهضاوي – برشة منهم خراو فيه و بالخصوص القاعدة متاعهم – كيف 7 شهور يحكي على حكومة الظل و كمال اللطيف و السبسي عميل ... و الجماعة ساهرة مع بعضها عند سفير دزاير و معاهم جماعة النهضة ...

ملاحظة لا تمت للواقع بصلة:

زعبع قاللنا الشباب هو الحل ... نفس العام هز دبشو و قطّع ...

تونس أنتخبت و قالت كلمتها

تونس أنتخبت و قالت كلمتها ... و الكلمة هذي ماهيش باش تعجب " الخاسر " في الإنتخابات ..

النتائج الأوّليّة المسربة تقول بتقدّم النهضة بفارق أقل ما يقال عنّو كبير على أقرب مترشّح ..

مفاجأة الإنتخابات موش كان سقوط القوى الحداثية و اليسارية – و خصوصا الشيوعي و القطب – المفاجأة الكبرى هي الحامدي أو ما يعرف عند التونسيين المتسيسين – من نهضة و تقدم و مؤتمر و تكتل و قطب و شيوعي و ... – بقذّافي تونس ...

الخاسر في الإنتخابات هذي هو إلّي يشوف هذي الإنتخابات من زاوية شخصية ضيقة ... و كان حزب خسر ... 

تونس ربحت ... أوّل مرّة انتخابات شفّافة بالدرجة هذي لازم الناس الكل تكون فخورة بيها ...

ثمّ حاجات شدّت انتباهي في الإنتخابات هذي ... و هي الخطاب الحزبي .. فكل يغنّي على ليلاه, و خسارة الأحزاب التقدمية و الحداثية هي بمجملها بناء خطابها الإنتخابي على منافسة النهضة إلّي اعتمدت أكثر على منادات و مناشدة الوازع الديني للناخب .. و التونسي مسلم بطبيعتو و يغار على دينو

الخطاب الثاني كان إستعمال وسائل الإعلام فالقوي الحداثية و التقدمية كانت حاضرة بقوّة في نسمة .. ونسمة وقعت في فخ التطرف الحداثي بعرض فيلم استغلّوه المتطرفين المتأسلمين لمواجهة التقدميين و كانلهم ما حبّو ...

اتهام التوانسة بالجهل و الغباء اتهام موش في بلاصتو على خاطر التوانسة الكل موش كيف كيف و العايلة التونسية بيدها ماهيش كيف كيف ... كان ما صوتلكش التونسي اليوم اخدم على روحك ... شوفو اش يحب و اقنعو باش ينتخبك بأفعالك موش بسبّان المنافس متاعك ...

نرجعو للمفاجأة الكبرى ... الحامدي هذا نعرف عليه حاجة وحدة ... مرّة تفرجت عليه في الجزيرة في الإتجاه المعاكس و كان مقابلو الغنّوشي ... و كان مع زعبع "حتّى لوكان يحبسلو العايلة متاعو"

الهاشمي هذا استعمل العروشية في الخطاب الإنتخابي متاعو و زيد داخل ببرنامج روبنهودي "بفكان الفلوس متاع إلّي عندو و يعطيه للي ما عندوش" يحب يولّي رئيس ... صحّة ليه بعض التوانسة مازالت تخمم بلوغة ولد حومتي و ولدي عشيرتي و ولد نانت عمتي ... وزيد المبادرة متاع ولد مرجان ما جابت مقاعد كان في الساحل ... و زيدهم عبد الناظر في صفاقس ...

الحاجة الباهية في الحامدي أنّو وحد التوانسة الكل -– من نهضة و تقدم و مؤتمر و تكتل و قطب و شيوعي و شعب موش متحزّب..– على كلمة "منين طلع هذا "

كثرة الأحزاب الصغيرة و كثرة القوائم المستقلّة كانلها أثر كبير علي المجرى الإنتخابي ... بالطبيعة برشة أصوات ماكنلها حتّي قيمة إنتخابية و مشات في الفارغ للأسف و هذا لازمو يكون عبرة للجميع باش ما يدخلوش فرادي كان وزنهم صغير  ... و ينقصو برشة غرور ... و هانا نتعلمو

برافو للمرزوقي إلّي أثبت أنّو المال السياسي ماعندوش قيمة كبيرة قدّام الفكرة ... على الرغم للسابوتاج إلّي عملو لليسار التونسي ...

لازمنا نفكرو بعقلية تونس ربحت موش حزب ربح و حزب خسر ... و العمل الثوري توّا بدا ... و إلّي يحب ألّي في بالو ... الشارع قدّامنا و كيف ما طار زعبع ... أي ديكتاتور آخر نطيروه ...

 ... يا جماعة ... برجولية يزيونا من الغش و النرفزة , التفدليك هو أصل الديمقراطية كيف نفركوها على حزب لازمو يقبل الفدلكة كانو رابح و إلاّ خاسر ... و يزيونا من ماء الفرق و سرير بو خمسة بلايص ...  الحاجة الباهية توّا نجمو نقولو لنهضة و جماعتها "طحّانة الحاكم "

تحيا تونس